udhr
Version:
Universal Declaration of Human Rights
131 lines (130 loc) • 9.65 kB
HTML
<html data-code="yuz" data-iso6393="yuz" dir="ltr" lang="yuz">
<head>
<title>Yuracare</title>
</head>
<body>
<article data-number="1">
<h1>Artículo 1</h1>
<p>Mammui sehuepshëuja, bëchuta lëtta shunñeja calibajti dulaniti lijutishcutase, cürús imbëtëya ibaau. Achuta emejmesh pujti tandyuju ana buibu.</p>
</article>
<article data-number="2">
<h1>Artículo 2</h1>
<p>Ana buibu lidyajutischcuta, malibanaja mammui shunñeu, yeeu, seuhueu cürüs imbëtëniuti. Nish ujamash amapshëutiia, amashiutila, amashcuta, ipëieutila, shunñeu, yeeu, amatila mabuibu, Dios canieleu cusuti nish canleleu, ipodejpojbëshëu, nish idejpojbëshëu. Tammui cürüs taya ibaata. Amumui ana buibu dyajujtiti, tandyuju talibatiia dulantuti, latijsha catütuntuti, naa taeme taelei, latijsha nish taeme taeiei tütütutijsha talibala catütüntuti amumui tuhua tajusujbëshë.</p>
</article>
<article data-number="3">
<h1>Artículo 3</h1>
<p>Mammui shunñeu, yeeu, seuhueu, malibala huinaniniuti nish shojtomash, latijsha nish idyulujtumamash cuta.</p>
</article>
<article data-number="4">
<h1>Artículo 4</h1>
<p>Lëttamash nish caliba mëë minyanaujanaya, misahuacheniti lati lijusutishcuta mëja nish mëliba lacha achuta mambëeninti. Achuta tandyuju ana buibu.</p>
</article>
<article data-number="5">
<h1>Artículo 5</h1>
<p>Lettamash nish caliba benebenesh mibobo, mibisa, misahuache, chantó. Më nish mëliba lacha lachuta mambëninti.</p>
</article>
<article data-number="6">
<h1>Artículo 6</h1>
<p>Méja meliba mutojoninti attimau, naa attimaushcuta, mëliba nish mielei huinanimtijsha, huil lëchi malamtijsha mutojonimti mammui.</p>
</article>
<article data-number="7">
<h1>Artículo 7</h1>
<p>Ana buibuja matebe mammui ana elleibëshëu, dulaya ibaau cürüs ana buida lidyajutishcuta.</p>
</article>
<article data-number="8">
<h1>Artículo 8</h1>
<p>Mandyujuya ibaau buitau, shunñeu nish dulauti ana buibu lidyajutishcuta. Achaya dulasbtau mammui cürüs ati buibu lidyajutishcuta.</p>
</article>
<article data-number="9">
<h1>Artículo 9</h1>
<p>Lëttamas nish caliba miyuppaniti naa sibbë ënnëtëjbëshëu matebëchi, nish caiiba lacha mimsiyaniti, latisha limittaniti mipënnëtë, nish caliba mibacheniti mi elejsha, nish mibacheya ibaanish.</p>
</article>
<article data-number="10">
<h1>Artículo 10</h1>
<p>Mibaliya ënnëtës mëtauti, ënnetësh mëtaya ibaau mammui matantijula maileya ibaa amashcuta mimbështautila, sibbë ënnëtejbëshëu matebechi buitaja nish lëttajtija emej mesh ibëbëya ibaa.</p>
</article>
<article data-number="11">
<h1>Artículo 11</h1>
<p>Amumui shunñe ënnëtesh cutauti, cani mayleya emejmesh naa ënnëtëjbëshë dulati, lëttamash nisha caliba mibisa mibobo chaniti. Maileya dulamti ënnëtäjbëshë mibacheya ibaau sibbë ënnëtë adulajbesheu matebechi.</p>
</article>
<article data-number="12">
<h1>Artículo 12</h1>
<p>Me ja mutojoya ibam mammui buitau, lëttamas nish caliba mëe dulamti ateli. Anuta dulacham mëtaniti, bëchuta cuibaliumap, teremtëp, mëë, mibashti, misehueu, cutase lachuta lëttamash nish yupaya ibaa misibëi mëë nish caliba leeniti miteremtë, nish ënnëtësh mindyajudyaya ibaa lacha.</p>
</article>
<article data-number="13">
<h1>Artículo 13</h1>
<p>Mëë mijusulëti malaya ibaam mielesha atta ellechi maa më limijusutchi, yosce mëë mijusulëti huitilaya ibaam mieme ni elechi.</p>
</article>
<article data-number="14">
<h1>Artículo 14</h1>
<p>Amai lëtta ënnëtësh mimbëti, meliba malanimti atta ellechi, latchi malamtijsha mutojoya ibaam attima buitau, mëja mabobom asetem chamamti attima buitau nish maliba mëe mutojonimti, na mëja nish dulamtila ati buibu lidyaju, tischcuta.</p>
</article>
<article data-number="15">
<h1>Artículo 15</h1>
<p>Mammui shunñeu, yeeu, seuhueu, maliba tütümüiti maeleei, lëttamash nish caliba nish tütücham mëtaniti, mëë limijusutish cuta meliba tütünimti atta ellechi.</p>
</article>
<article data-number="16">
<h1>Artículo 16</h1>
<p>Mammui shunñeu, yeeu, maliba abashtiu abbau chaninti mansata shunñeu shendyeu chaya, laticcashbache cunhuinantashtaya nish maliba calanshijmittaniuti aniashcuta ibuibu latijsha amajsha beshëtila. Dios canlele cusuti nish canlele, shunñe yee cürüs dulaya ibaau latiu majusutishcuta.</p>
</article>
<article data-number="17">
<h1>Artículo 17</h1>
<p>Mammui maliba ayurujareniuti yancala bëshë, cusujbesheja candado, latijsha mammui lëtta majusuti cuta. Lettamash nish caliba nish ayurujarecham metaniti. Latijsha nish caliba mëlëminiti naa catütüjtimti.</p>
</article>
<article data-number="18">
<h1>Artículo 18</h1>
<p>Mëja mëliba mindala cuimalumaya camlelenimti Dios, mëë nish mijusuti letta mash nish caliba ati canlelecham mëtaniti. Meliba mindala, cusuti bëmëuti dulanimti limijusutishcuta.</p>
</article>
<article data-number="19">
<h1>Artículo 19</h1>
<p>Mammui shunneu, yeeu maliba latiu lijuibalimashcuta dyajuniuti buibu, mëliba manayujunimti yeeu mijuimalumata, catiuja mindyujuya ibaau lacha majui malumata, atta ellechibëshëu mandyujuya ibaam mijuimalumata, tettamash nish caliba lijaladyolaniti mi buibu.</p>
</article>
<article data-number="20">
<h1>Artículo 20</h1>
<p>Bëjtam shunñeu, yeeu, maliba latiu limajusutishcuta dechetaya mandyërëniti, lachuta lettamash nish caliba achuta dechetaya pandyërëni mutaniti, lettash nish mindyujutijsha melibalacha mutütünimti naa dechetajbëshëu lati.</p>
</article>
<article data-number="21">
<h1>Artículo 21</h1>
<p>Mamui shunñeu, yeeu, maliba lirnassëniuti tabuita presidente litütüchchi, paliba lacha malashij mijtipti pabuitaniu litütüniuti lachchi. Dechetaya lëttai shunñeu, yeeu, maliba calashijminiuti mabuitani, achuta dulaya ibaau majmammui.</p>
</article>
<article data-number="22">
<h1>Artículo 22</h1>
<p>Naa litütüjtimti maliba yitash mimbëniuti buitau, achaya meë mëliba ishta attachi malaya mappëlëmash mëileniti atta beshëë, latijsha consono mintoyou chaniu mëë, achuta mimbëya mëë cürüs lachuta mambëya ibaau mamui shunñeu, latijsha mammui naa yeeu miellei bëshëu nish miellei besheutijsha cürüs mambëya yitau.</p>
</article>
<article data-number="23">
<h1>Artículo 23</h1>
<p>Mammui maliba sahuataniuti, sahuata majusujbëshë, lëttamash nish caliba michittaniti misahuatajsha, consono mëlicheya ibaau achaya ati podejpoja mibibëcha cürüs mëë, mibashti, misehueu cuta. Mammui sahuatatebeuja lachuta cuibaliumaya muiteya ibaau buitau achaya cürüs malichestautila.</p>
</article>
<article data-number="24">
<h1>Artículo 24</h1>
<p>Mammui ilaulaya ibaau, ilaulaya lishudyeu, cundyeteu chachauya, lachuta ilaulaya ibaau lacha naa lisahua tautijsha, nish sahuatautijsha malicheya ibaau mabuitau.</p>
</article>
<article data-number="25">
<h1>Artículo 25</h1>
<p>Mammui shunñeu, yeeu seuhueu, cuta mantoyoya ibaau dojjo ujajbëshëu, lachuta lëtta yee inñumati itoyoya ibaau. Ana buibuja dyaju amumui atta bëshëë talabannati tambacheya ibaautila tabuitau tahuëchititi, tudyunmëti, sibbë talabannati cuto.</p>
</article>
<article data-number="26">
<h1>Artículo 26</h1>
<p>Mammui yupataya ibaau escueiachi, matatauja mayupapaya ibaau naa escuela latiu limajusuchchi, yupataya ibaaula naa nish majasuj bëshëutijsha, tandyuju lacha naa estudiash taj bësheja calashijmiya naa estudiash tajtiti, cürüs estudiaya ibaatila attimashcuta.</p>
<p>Naa mandyujujbëshëja mandyujuya ibaa, Dios canleleu cusuti nish canleleu, latijsha atta eliejshabësheu cuta.</p>
</article>
<article data-number="27">
<h1>Artículo 27</h1>
<p>Mammui maliba latiu majusutishcuta mutütüniuti maelei tütütjbëshëu, lëttai lishudyeya ibaau. Mammui maliba mantoyoniuti, latijsha dulaya ibaau naa dulantajtiuti. Mandyujuya ibaau naa bëshëë mailejtiti, ajantaniuti, librundulaniuti, naa yitash cuibaliumaniuti, nish shojtomash mandyujuya ibaam misahuata attaimau latijsha mëliba dulanimti naa lëttai dulantajtimti. Stoyoya ibaam amumui midula, mëja mëliba catütünimti bëshë ati midulaula.</p>
</article>
<article data-number="28">
<h1>Artículo 28</h1>
<p>Mammui lana ellei tütüjbëshëuja atta ellechi bëshëutina, dechetauja dyaju tütüya ibaatila yitajbëshë, shudyete cuta. Achuta dulauti mammui, malibashta dulaniuti yitajbëshë litütüuti.</p>
</article>
<article data-number="29">
<h1>Artículo 29</h1>
<p>Mammui maliba dulaniuti cuibaliumajtiuti naa litütüuti, atila mëë mëlibalacha dulanimti naa dulantajtimti attaimautina. Lëttamash nish ënnësh mëtaya ibaa mëilën tati bëshëë. Ana burbuja nish caliba lacha shunñe ënnëtesh ibëbëntaniti.</p>
<p>Lachamatijsha ana buíja tandyuju naa talibatila huinanintuti tammui yitash latijsha attaja yitash tambëya ibaa lacha.</p>
</article>
<article data-number="30">
<h1>Artículo 30</h1>
<p>Ammui ellei, lëttamash pais, attima buitau tütüjbëshë, latijsha lëttamash shunñe nish caliba pëië ibëbëniti ana buibu mammui matebe, naa lileetijtiti lëshpëniccajsha.</p>
</article>
</body>
</html>