udhr

<!doctype html> <html data-code="auc" data-iso6393="auc" dir="ltr" lang="auc"> <head> <title>Waorani</title> </head> <body> <header> <h1>ANOYOMO</h1> <p>Ponente waa kewenge beye kekinani tomame inke tomamo anobay wadani bay adomonke kedamay ingimpa tomamo watape betente mono wenkaba waa kewegimpa.</p> <p> Tomenani eñenamay beye mono waomo kewenge beye tomenani ananipa wakete godominke entegoke beye ekame inke tomemoke nangi kebo imopa ante anamay inginani tomenani yekede ekame inani inke anamay inani tomenanike godominke ponente kekinani. </p> <p> Tomenani manomay waomo imonte wakedani kewegimpa tomemo wakeki beye inkete mono ongeyemo tomaa tomenani ebano tokode nenani anobay mono kete negimo imompa. </p> <p> Tomenani ananipa manomay waponi kemo ate godominke watape kegqkimpa tomenani wabeka nani keka. </p> <p> Waakiwiminipa ante wabeka kewenani yewemonte daa pononanipa tomemo waomo waa kewenge beye aye adobay minito kewenge adobay impa ante ananipa ongiyenani tono onkiyenani adobay tomenani kewenge waa kewenge impa ante ananipa. </p> <p> Wabeka kewenani monorilay tomenani wakedanipa ankedanimpa ananipa, tomaa nani beetente wabeka kedani waponi iñomo kewenani tomenani watape keeme kedamay mono waomo imonte kekedanimpa. </p> <p> Manomaymono beye wakedanipa tomaa ono waa kewengi beye godominke wakete ate noynga tomaa mono ani wakemo ate toynga kemompa anginani. </p> <p>Tomamo beetentetedeke</p> <p>Ñowopone manomay amopa</p> <p>Manomay tomamo waomo beye ampa</p> <p> Tomamo iyomo kewemo aye anobay wabeka kewenani godominke kekedanimpa, tomamo waomo tomaa na ni keyomo kemo imompa, tome beyenke kemo imompa, godominke kemo waa bakimpa, manomay kemoni ate tomenani eñenkedanimpa, nani kemo ate waokedani kewegimpa, aye manomay kemo ate iñomo inke wabeka kedani godominke kekinani manomay mono kemo ate iñomo inke wabeka adobay godominke kemo gan wenamay igimpa tomemo mono keyomo. </p> </header> <article data-number="1"> <h1>Nani añomo 1</h1> <p> Tomamo waomo ekame wee anamay inani tomemo kewengi beye tomamo neemompa noynga impa aye anobay impa wadani inanite wakeki beye angampa. </p> </article> <article data-number="2"> <h1>Nani añomo 2</h1> <p> Tomamo waomo nemompa mono wakewengi beye aganpa toma kogodi anobay mono wao bay tomamo pinamay geya godominke wakete kewengimo ante angampa. </p> <p> Aye adobay nani keyomo wado kedamay inkedanimpa kowekogodi bay awedibakirno ante, anobay geñente kekemoni tomameka nani keyomo aye tomaa ome tomemonke ponente godominke mono keyomo kekimpa manomay kedamay imo ate wedenki wegimpa, tomemo adomke kekimo. </p> </article> <article data-number="3"> <h1>Nani añomo 3</h1> <p> Tomamo waomo waakete kewengimpa imompa, keeme kedamay watape waomo yekede kewegimpa. </p> </article> <article data-number="4"> <h1>Nani añomo 4</h1> <p> Adokanki manomay impa ante temoneketante pinte inkekaympa, manomay kemo kete kekedanimpa ananipa tomañomo kedamay inkeminimpa ante ampa. </p> </article> <article data-number="5"> <h1>Nani añomo 5</h1> <p> Ekame inke manomay kete wenonkeboympa ante ponente keramayaye adobay keeme inke wiwa kedamay inkedanimpa. </p> </article> <article data-number="6"> <h1>Nani añomo 6</h1> <p> Tomamo waomo neemompa toynga keki tomañomo manomay waomo nani kebay geya kete watape kewengimpa tomemo ponente keki impa ante angampa. </p> </article> <article data-number="7"> <h1>Nani añomo 7</h1> <p> Tomamo beye adobay nano ley amay nemompa, maninani wadani inanipa ante anamay ingimpa adobay tomamo beye nano amay ampa. Tomamo adobay wakete kewengimpa wiwa kedamay kewegimpa ante ampa. </p> </article> <article data-number="8"> <h1>Nani añomo 8</h1> <p> Tomamo waomo tomaa mono kewengi beye nemompa tomaa nani keyomo aye adobay manomay nani geya geya keyomo wiwa kedamay tomemo kewengi beyeampa nano amay adobay kekemoni. </p> </article> <article data-number="9"> <h1>Nani añomo 9</h1> <p> Ekame inke maniganka pomimpa .ante anamay inkedanimpa, aye teemonedamay wabi imipa ante anamay inginani. </p> </article> <article data-number="10"> <h1>Nani añomo 10</h1> <p> Tomamo waakeki beye neemompa, adobay tomamo imompa, tomamo waomo adobay imompa ante tomanani nani nangi keyomo amo eñenkedanimpa aye adobay tomaa kigame inke moneketante nani aa wakeki impa. </p> </article> <article data-number="11"> <h1>Nani añomo 11</h1> <ol> <li> <p> Tomamo waomo wiwa wenonte kemo mono kewenge beye neemo imompa tomaa tomenani nano amaytono nani waakeki ganka ñowo tomaa naniganka tomimi wiwa kedi deebakiganka kekimpa. </p> </li> <li> <p> Ekame inke nanomae wiwa kebipa ante anamay inkedanimpa tomenani tomimi manomay kete wenomimpa nani angi ganka, emewo wengi ganka tomimi wiwa kedi beye kedanipa tomenani wabi imimpa nani angi ganka. </p> </li> </ol> </article> <article data-number="12"> <h1>Nani añomo 12</h1> <p> Ekame inkete adoke awengo bay impa ante anamay inkedanimpa tomimi kewenge beye tomaa tomimi wenani tono keweñomo ekame inke ponte onabay ikedanimpa tomamo waomo nano amay kewemo imompa. </p> </article> <article data-number="13"> <h1>Nani añomo 13</h1> <ol> <li> <p> Tomamo waomo kigame anamay inani kewokimpa aye anobay apengimpa tomemo mono kewente poñomo beye. </p> </li> <li> <p>Tomamo waomotomimi aenente ponkebimpa.</p> </li> </ol> </article> <article data-number="14"> <h1>Nani añomo 14</h1> <ol> <li> <p> Tomemo eyomome inke kewenginani watape tote kewegimo aye adobay wabeka inke kewenginani. </p> </li> <li> <p> Mani monito watape kewe ekame inke weeponte anamay inkedanimpa aye wiwa kedamay inkedanimpa tomaa nani keyomo anamay inkedanimpa tomame mono keweñomo beye. </p> </li> </ol> </article> <article data-number="15"> <h1>Naní añomo 15</h1> <ol> <li> <p>Tomamo waomowado tedemo watape kewengimo imompa.</p> </li> <li> <p> Ekame waomo inke piinte peyempote enamay inkedanimpa aye adobay waka ingante enamay inkedanimpa. </p> </li> </ol> </article> <article data-number="16"> <h1>Naní añomo 16</h1> <ol> <li> <p> Ongiyenani tono onkiyenani tomenani pikenani bate ate adobay wakete kewengi beye nenanipa aye adobay wakabodani tono wegongi igante ponenani monte ate tomenani adobay wakete kewengi nenanipa aye adobay nanoge monte pamenani wakewegi beye nenanipa. </p> </li> <li> <p> Ekame inke adokanke waa inte beetenamay inga tomenga adoke onkiye ingante momaygampa. </p> </li> <li> <p> Nani wenkabo inani yekede iyomo kowe pedani inkedanimpa tomenani kowe wakete kewengi imompa ñene ome nano anbay. </p> </li> </ol> </article> <article data-number="17"> <h1>Nani añomo 17</h1> <ol> <li> <p> Tomamo waomo mono kewenge beye neemompa tomemo kewenge aye adobay adoke adoke iyomo kewenkebimpa. </p> </li> <li> <p>Ekame inke ponte wee anamay inkedanimpa tomimi keweñomo.</p> </li> </ol> </article> <article data-number="18"> <h1>Nani añomo 18</h1> <p> Tomamo waomo imonte ananay inginani adobay ponemo imompa, mono adobay wegongi ingante ponemo imompa aye adobay tomemo wado ponemo imompa tomemo kewengi beye aye tomenani ananipa tomañomo adobay kewengi impa, eñenge, tomemo mono kee, aye manomay impa ante akimoni. </p> </article> <article data-number="19"> <h1>Nani añomo 19</h1> <p> Tomamo waomo imonte keeme anamay inkedanimpa aye wiwa kedamay anamay waka ome maniganka impa ante tededamay inginani naniganka waka kii ome toy impa ante anamay inginani tomenani watape kiwiginani. </p> </article> <article data-number="20"> <h1>Nani añomo 20</h1> <ol> <li> <p>Tomamo waomo imompa watape keeme anmay inani kewegimpa.</p> </li> <li> <p> kame inkete wakabodani nani beetente nani keyomo beetenamay inginga tomemo betente keyomonki kete kewegimpa. </p> </li> </ol> </article> <article data-number="21"> <h1>Nani añomo 21</h1> <ol> <li> <p> Tomamo waomo anamay inani mono ome beye awene bakimpa ekame inke bito bakebimpa ante anamay tomeganki ponente bakinga. </p> </li> <li> <p>Tomamo waomo kigame anamay inani ñene nani keyomo adobay kekimpa.</p> </li> <li> <p> Tomenanike ponente manomay mono ome beye kete kewegimpa ankedanimpa godominki manomay kemo ate tbmanani tomenga waponi kekampa ante mono awene bakibeye mono gidinani akedanipa. </p> </li> </ol> </article> <article data-number="22"> <h1>Nani añomo 22</h1> <p> Tomamo waomo iyomo watape kete kewegimo imompa tomaa manomay kemo ate wabeka kewenani tomenani wakedanipa tomemo minkayonta neñomo tokode wenani tomenkaka tomemomke ponente mono ome beye kekimpa. </p> </article> <article data-number="23"> <h1>Nani añomo 23</h1> <ol> <li> <p> Tomamo waomo anamay inani ome kekimpa anamay inani tomemonke kekimo wii tomenke wa wa kekimoni waka ponte manomay kedamay inginga. </p> </li> <li> <p> omamo waomo imonte ekame inke ponte piinte daagodonamay inkedanimpa wadani nani kete eempo anopo egimpa. </p> </li> <li> <p> Tomamo waomo mono kete eebeye anopo iinki kete tawemo ate onodo anopo kowe pononani egimpa manomay geñado geña watape kete ente kewegimoni aye adobay mono imonte adani kewegimpa. </p> </li> <li> <p>Tomamo waomo adobay negimpa manomay nemo ate waakedani kewegimpa.</p> </li> </ol> </article> <article data-number="24"> <h1>Nani añomo 24</h1> <p> Tomamo waomo adobay gemangi neginmo imompa gote eñate toke beye epogado ome ketawo ante ponente gemagimpa tomeñede adobay tokode ponogrnani. </p> </article> <article data-number="25"> <h1>Nani añomo 25</h1> <ol> <li> <p> Tomamo waomo tomenani ebano kete watape nani kewemay kewegimo imompa watape tomimi gidinani kewengi beye aye anobay watape wiwa badamay kewenge beye, watape kete kengibeye, weeko weñaki beye, tomemo keweñomo beye, biimo kedani kowe mee ongongi beye aye tomamo watape wiwa kedamay kewengi; aye anamay ongongimpa ome nooponi nani kedani beye daykawo beye, komante inani beye, pameynani beye, aye anobay pike badani beye tomamo anobay imompa tomemo wiwa baki beye. </p> </li> <li> <p> Teke. wiñenani inke yedemana badani ate edemo aakimo imompa tomenani inanite. Tomanani edemo moynani wiñénani eñadani ate aye anobay ononke manani inanite, aye anobay tomamo watape wadani bay kete kewegimpa. </p> </li> </ol> </article> <article data-number="26"> <h1>Nani añomo 26</h1> <ol> <li> <p> Tomamo waomo eñenge beye neemo imompa. Keeme godonamay eñegimo imompa, manoamay kete tomamo tomebeyenke. Tomaa mono kee kowe keki impa iyomo mono kebeye yekede eñenaniki manomay keki impa; nangi nani ayomo yekee tomamo adobay akimo imompa. </p> </li> <li> <p> Eñenge yekede godominke manomay kete watape kete eñenge impa aye anobay waomo keeme wiwa kedamay watape kewegimo imompa tomemomke ponente wakekibeye; eñenge beye, watape kete wadekimoni tomame wado tededani wado kedani inanite ñene ome kedani waa kewenge beye wakekedanimpa. </p> </li> <li> <p> Tomanani Wempoydi tomenani wiñenani eñenge beye apekinani waemo eñenge impa anani eñenkedanimpa. </p> </li> </ol> </article> <article data-number="27"> <h1>Nani añomo 27</h1> <ol> <li> <p> Tomamo waomo nemompa keeme ananay inani kewegimo imompa tomemo keweñomo, tomemo tomaa digintaydi neente kewebeye aye anobay tomenanike nani ponente keebeye mono ome godominke wakete kewengi beye. </p> </li> <li> <p> Tomamo waomo negimo imompa wakedani kewengi ponente nani kebeye aye tomemo mono kekaakatomemonke ponente godomeinke kaki beye, mono tomemo ani doobe tatimpa tomemo emowo. </p> </li> </ol> </article> <article data-number="28"> <h1>Nani añomo 28</h1> <p> Tomamo waomo neemompa wakeki beye ñene ome nani manomay kete wakewegimpa ante ananipa tomemo watape kete kewengi beye. </p> </article> <article data-number="29"> <h1>Nani añomo 29</h1> <ol> <li> <p> Tomamo waomo nemompa wakete kewenge tomemo keñomo, tomenga nano keyomomke kemo ate godominke kingame anomay inani tomemo kete watape kewegimpa. </p> </li> <li> <p> Tomemo mono keñomo watape kete kewegimpa keeme anamay inani, tomenani tomamo waomo adoke kigame bay ponenanipa inkete tomamo mono nemompa nano amay tomemo kewenge beye watape wakete tomemo keeme anamay inani kewegimpa pankadaniya yekede ante ananipa toynga tomamo kekibeye aye anobay geya kekimpa ampa keeme anamay inani kewegimpa. </p> </li> <li> <p> Mani mono neente watape kewe ekame anamay inkedanimpa manomay nenamay mono tomemo godominke watape kekedanimpa ante wabeka kedani. </p> </li> </ol> </article> <article data-number="30"> <h1>Nani añomo 30</h1> <p> Ekame inke anamay inkedanimpa manomay tomenani igampa ante ponente kedamay inginga wabeka nani kee wakabodani wii inte adokanki ingante nani godominke watape keegoo yekede watape godominke kegókimpa ante ananipa. </p> </article> </body> </html>